維園MacLaurin Building 林思齊禮堂 卑詩省督—加拿大香港移民神話
「維園秘聞之二」各位維港仔女如果有黎今次維港聚既話，唔知你地有冇留意MacLaurin Building 其實入面有一個以加拿大香港移民命名既演講堂。
林思齊禮堂（David Lam Auditorium)，維園唯一以華人名字命名既演講堂。點解添仔之前會話MacLaurin Building 對於維港社，對於香港人係一個富有意義既地方，就係因為林思齊禮堂本身所承載既係一段屬於香港人係維多利亞，係加拿大既一個非凡既故事，一個屬於香港人移民加拿大既神話。
林思齊係加拿大史上首位華人省督，於1988-1995年擔任第二十五任卑詩省省督。林思齊生於二十年代既英屬香港，出身於銀行世家。佢係六十年代到維多利亞旅行，俾首府既維港風景吸引到加拿大移民定居。移民加拿大後，林思齊於溫哥華成就非凡又熱心公益，並獲當時既加拿大總理Martin Brian Mulroney 提名出任卑詩省省督。
林督任內正值於香港移民潮高峰期；當時由於香港主權即將要由大不列顛及北愛爾蘭聯合王國移交中華人民共和國，香港人因香港前途不明朗問題而大量移居海外。加拿大卑詩省溫哥華，以及安大略省多倫多成為大量香港人的新家園。林督面對大量香港人移民卑詩省的局面，佢努力協助初到加拿大的香港移民融入加拿大，以及化解一度因大量新移民定居卑詩省而引發的社會矛盾問題。
政治哲學上，林督亦十分影響卑詩省歷史上首位華人廳長，同為加拿大香港移民的關慧貞。關慧貞在傳媒訪談中引述林督曾對她的一番話：「令你取得榮譽不是你的名銜，而是你做了甚麼去榮耀你的名銜。」
添仔拋書包引用未代港督彭定康既告別演講辭演說，其中一段有關形容維港人既部分，「They were only ordinary in the sense that most of them came here with nothing. They are extraordinary in what they have achieved against the odds.」;縱使香港人作為移民，縱使前路荊棘滿佈，縱使最初一無所有，香港人都可以運用智慧以及不斷努力，成就一個又一個維港傳奇，由遠東既維多利亞港，遠至北美卑詩省首府既維多利亞港；歷久不衰⋯⋯
添仔就講完今次既維園秘聞啦，有興趣既維港仔女記得經過林思齊禮堂既時候，望多幾眼啦。
編輯: Chan Ho
September 22, 2017
📷
Comments